E Filing in Courts from Jan, 2022- ಜನವರಿ 1ರಿಂದ ಇ-ಫೈಲಿಂಗ್ ಕಡ್ಡಾಯ; ಭೌತಿಕ ಫೈಲಿಂಗ್‌ಗೆ ಅನುಮತಿ ಇಲ್ಲ: ಸುಪ್ರೀಂ ಕೋರ್ಟ್
ಜನವರಿ 1ರಿಂದ ಇ-ಫೈಲಿಂಗ್ ಕಡ್ಡಾಯ; ಭೌತಿಕ ಫೈಲಿಂಗ್‌ಗೆ ಅನುಮತಿ ಇಲ್ಲ: ಸುಪ್ರೀಂ ಕೋರ್ಟ್
- 1-01-2022ರ ನಂತರ ಇ- ಫೈಲಿಂಗ್ ಕಡ್ಡಾಯ
- ಸರ್ಕಾರದ ಅರ್ಜಿ/ಪ್ರಕರಣಗಳಿಗೆ ಅನ್ವಯ
- ಎಲ್ಲ ಹೈಕೋರ್ಟ್‌ಗಳಿಗೆ ಸುಪ್ರೀಂ ಕೋರ್ಟ್ ತಾಕೀತು
- ಎಲ್ಲ ಪಕ್ಷಕಾರರೂ ಇ-ಫೈಲಿಂಗ್ ನಲ್ಲೇ ಅರ್ಜಿ ಸಲ್ಲಿಸುವುದು
- ಎನ್‌.ಐ. ಆಕ್ಟ್ ಸಹಿತ ಪ್ರಮುಖ ಅರ್ಜಿ/ದೂರುಗಳಿಗೂ ಅನ್ವಯ..!?
2022ರ ಜನವರಿ 1ರಿಂದ ಹೈಕೋರ್ಟ್‌ಗಳಲ್ಲಿ ಸರ್ಕಾರ ಸಲ್ಲಿಸುವ ಎಲ್ಲ ಅರ್ಜಿ ಮತ್ತು ಪ್ರಕರಣಗಳು ಇ ಫೈಲಿಂಗ್ ಮೂಲಕ ಸಲ್ಲಿಸುವಂತೆ ನೋಡಿಕೊಳ್ಳಬೇಕು ಎಂದು ಎಲ್ಲ ಹೈಕೋರ್ಟ್‌ಗಳಿಗೆ ಸುಪ್ರೀಂ ಕೋರ್ಟ್ ನಿರ್ದೇಶನ ನೀಡಿದೆ.
ಈ ಅವಧಿ ಬಳಿಕ ಸರ್ಕಾರ ಭೌತಿಕವಾಗಿ ಪ್ರಕರಣ ಯಾ ಅರ್ಜಿ ಸಲ್ಲಿಸಿದರೆ ಅದಕ್ಕೆ ಅನುಮತಿ ಇಲ್ಲ ಎಂದು ಸುಪ್ರೀಂ ಕೋರ್ಟ್‌ನ ಇ-ಸಮಿತಿಯ ಅಧ್ಯಕ್ಷರಾದ ಮಾನ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ಹೇಳಿದ್ದಾರೆ. ಈ ಬಗ್ಗೆ ದೇಶದ ಎಲ್ಲ ಹೈಕೋರ್ಟ್ ಗಳಿಗೆ ಬರೆದ ಪತ್ರದಲ್ಲಿ ಅವರು ತಿಳಿಸಿದ್ದಾರೆ.
ಆದಾಯ ತೆರಿಗೆ, ಮಧ್ಯಸ್ಥಿಕೆ, ವಾಣಿಜ್ಯ ದಾವೆ ಯಾ ವ್ಯಾಜ್ಯಕ್ಕೆ ಸಂಬಂಧಿಸಿದ ಕೆಲ ವರ್ಗಗಳಲ್ಲಿ ಹೈಕೋರ್ಟ್ ಸೂಕ್ತ ಎಂದು ಪರಿಗಣಿಸುವ ಯಾವುದೇ ವರ್ಗಗಳಲ್ಲಿ ಎಲ್ಲ ಪಕ್ಷಕಾರರಿಗೆ ಜನವರಿ ಒಂದರಿಂದ ಇ-ಫೈಲಿಂಗ್ ಮೂಲಕ ಅರ್ಜಿ ಸಲ್ಲಿಸುವುದು ಕಡ್ಡಾಯವಾಗಲಿದೆ.
ಅಧೀನ ನ್ಯಾಯಾಲಯಗಳ ತೀರ್ಪು ಯಾ ಆದೇಶ ಪ್ರಶ್ನಿಸಿ ಸಲ್ಲಿಸಲಾಗುವ ಅರ್ಜಿಗಳು, ಮೇಲ್ಮನವಿಗಳು ಮತ್ತು ಮರು ಪರಿಶೀಲನಾ ಅರ್ಜಿಗಳಿಗೂ ಇದು ಅನ್ವಯವಾಗಲಿದೆ. ಅಂದರೆ, ಈ ಮೇಲಿನ ಎಲ್ಲ ಅರ್ಜಿಗಳೂ 2022ರ ಜನವರಿ 1ರಿಂದ ಇ-ಫೈಲಿಂಗ್ ಮೂಲಕವೇ ಕಡ್ಡಾಯವಾಗಿ ಸಲ್ಲಿಕೆಯಾಗಬೇಕಾಗಿದೆ.
ಮೇಲ್ಮನವಿ ಅಥವಾ ಮರುಪರಿಶೀಲನಾ ಅರ್ಜಿಯ ಇ-ಫೈಲಿಂಗ್ ಸಂದರ್ಭದಲ್ಲಿ ವಿಚಾರಣಾ ನ್ಯಾಯಾಲಯದ ಅಗತ್ಯ ದಾಖಲೆಯನ್ನು ಮೇಲ್ಮನವಿ / ಮರುಪರಿಶೀಲನಾ ನ್ಯಾಯಾಲಯದೊಂದಿಗೆ ಡಿಜಿಟಲ್ ಲಿಂಕ್ ಮಾಡಬಹುದು ಎಂದು ಇ ಸಮಿತಿ ತನ್ನ ಪತ್ರದಲ್ಲಿ ತಿಳಿಸಿದೆ.
ನೆಗೋಶಿಯೇಬಲ್ ಇನ್ಸ್‌ಟ್ರುಮೆಂಟ್ಸ್ ಕಾಯ್ದೆಯ ಸೆಕ್ಷನ್ 138ರ ಅಡಿಯಲ್ಲಿ ದಾಖಲಾಗುವ ಹಣ ಮರುಪಾವತಿ ದಾವೆ, ದೂರುಗಳು, ಜೀವನಾಂಶದ ಅರ್ಜಿಗಳುಇ, ಪರಸ್ಪರ ಸಮ್ಮತಿಯ ವಿಚ್ಚೇದನ ದೂರುಗಳು ಹಾಗೂ ಜಾಮೀನು ಅರ್ಜಿಗಳನ್ನು ಇ-ಫೈಲಿಂಗ್‌ಗೆ ಪರಿಗಣಿಸಬಹುದು ಎಂದು ಸಮಿತಿ ತನ್ನ ಪತ್ರದಲ್ಲಿ ತಿಳಿಸಿದೆ.
